Monumentenfonds Aruba celebra 30 aña y anuncia futuro restauracion di Iglesia Comunitario
Recientemente Stichting Monumentenfonds Aruba a conmemora su di 30 aniversario durante un ceremonia special celebra na Iglesia Comunitario. Durante e acto, e enfoke principal tabata riba e importancia di preserva patrimonio historico di Aruba y e futuro restauracion di un di e monumentonan mas emblematico di nos isla. Prome Minister Mike Eman, Minister di Infrastructura Rene Herde como tambe representantenan di Gobierno di Aruba, Monumentenfonds Aruba, Comunidad Protestant y Fundacion Iglesia Comunitario a reuni pa marca oficialmente e siguiente fase den e proceso preliminar relaciona cu e futuro desaroyo y conservacion di E Iglesia Comunitario. E colaboracion entre e diferente partinan cu ta representa un paso importante den e compromiso comparti pa proteha y preserva e herencia cultural y historico di Aruba pa generacionnan futuro.
