MoU Corsou y Aruba
Recientemente, a tuma lugar un ceremonia special dilanti e tankinan historico di Aruba Ports Authority, unda representantenan di Aruba y Corsou a reuni pa fortalece cooperacion entre e dos isla nan. Durante e ceremonia, Minister di Turismo, Transporte y Labor di Aruba, Sr. Wendrick Cicilia y Minister di Asuntonan Economico di Corsou, Roderick Middelhof, a firma un « Memorandum of Understanding » cu tin como meta amplia colaboracion den varios sector strategico entre e dos isla nan.
E acuerdo, cu ta valido pa un periodo inicial di tres aña, ta enfoca riba desaroyo turistico, conectividad aereo y maritimo, seguridad turistico, sostenibilidad, investigacion y capacitacion profesional den e industria di Turismo. E acuerdo ta representa un paso importante den fortalece e relacionnan entre Aruba y Corsou, cu e meta di crea mas oportunidadnan economico y promove crecimiento sostenible pa e dos isla nan.
