Ley nobo na Aruba: Interes maximo di 25% riba credito cuminsa 1 di Augustus
Iniciando prome di augustus proximo, Aruba ta conoce un ley nobo cu lo ta di beneficio pa e consumidor. Pa prome biaha lo existi un limite legal riba e interes y costonan cu por wordo cobra riba credito, credito di placa, credito di bienes y/of ora di empeña articulonan. Durante un rueda di prensa awemainta, Minister di Finansas y Economia, Sr. Geoffrey Wever conhuntamente cu Banco Central di Aruba a anuncia e proteccion importante aki cu lo ta drentando na vigor na inicio di augustus y cu lo conta cu un porcentahe maximo di 25% riba credito di consumidor otorga desde prome di augustus 2026 en adelante.
