Gobierno a reuni cu organisacionnan pa incentiva participacion na Dia Nacional pa Cuida Aruba
Gobierno di Aruba a tene un reunion na Bestuurskantoor pa informa y incentiva organisacionnan y boluntarionan pa uni na Dia Nacional pa Cuida Aruba. Prome Minister Mike Eman tabata presente na e encuentro, hunto cu e representantenan di diferente organisacion den comunidad. Durante e reunion, Gobierno a splica e meta y organisacion di Dia Nacional pa Cuida Aruba. E iniciativa ta invita henter pueblo pa pone man na obra y contribui activamente na limpiesa, cuido y embeyecemento di nos isla. Ademas di haci limpiesa, e dia tin como meta crea mas conscientisacion tocante e responsabilidad di nos tur pa conserva Aruba limpi y bunita.
