67 animal nobo lo yega Aruba pa mehora calidad di cria
Sector Primario ta conoce un inversion nobo despues di 14 aña. Durante un entrevista cu Telenoticia, Minister di Sector Primario, Geoffrey Wever, a splica cu, despues di dialogo cu diferente stakeholder y atencion di e Comision Pro Cunukero Arubiano, a identifica e necesidad pa mehora e genetica y calidad di cierto tipo di carni. Segun e minister, durante hopi aña no a importa suficiente animal nobo, loke por resulta den crusamento entre animalnan di e mes rasa y afecta e calidad di cria di entre otro, cabrito, carne y porco. Como parti di e inversion, un total di 67 animal nobo, entre nan cabrito, carne y porco, lo wordo importa y lo yega Aruba den e di tres siman di september. Minister Geoffrey Wever ta elabora mas tocante e inversion y su importancia pa e futuro di e Sector Primario.
