Ofis nasyonal asirans vyeyès (ONA) lanse ofisyèlman, jedi 9 jiyè 2026, edisyon 2026 pwogram ONA Police ak ONA Edikasyon, nan komin Petyonvil.

Aktivite sa a make kòmansman yon nouvo faz nan 2 pwogram sa yo ki vize ranfòse pwoteksyon sosyal pou ajan yo nan Polis Nasyonal Dayiti epi sipòte fanmi asire yo nan preparasyon edikasyon pitit yo.

0 0

Minis edikasyon nasyonal ak fòmasyon pwofesyonèl la, Vijonet DÉMÉRO, rankontre, jedi 9 jiyè 2026 la, responsab yo nan Fòs Lame Dayiti, Polis nasyonal DAyiti epi ministè jistis ak sekirite piblik, sou sekirite òganizasyon egzamen bakaloreya yo.

Direktè jeneral MENFP a, Osny JEAN MARIE, plizyè manm kabinè Minis DÉMÉRO ak lòt kad nan ministè a te patisipe nan rankont sa a.

Tout enstans konsène yo pwomèt pou ranfòse kolaborasyon yo pou pèmèt egzamen yo byen pase soti 13 pou rive 16 jiyè 2026 sou tout teritwa nasyonal la.

0 0

Chèf Leta ak gouvènman nan Kominote Karayib yo (CARICOM) reyafime solidarite yo ak pèp ayisyen an epi soutni jefò peyi Dayiti ap kontinye fè nan lide pou retabli sekirite, ranfòse enstitisyon demokratik yo epi pèmèt peyi a retounen sou chemen konstitisyon an.

Yon kominike òganizasyon an pibliye nan kad 51èm konferans òdinè li, ki te fèt Sainte-Lucie, soti 5 pou rive 8 jiyè, kote yo salye jefò gouvènman an ap fè pou retabli sekirite nan peyi a epi fè pwosesis elektoral la vanse.

CARICOM reyafime soutyen li ak ranfòsman fòs sekirite nasyonal yo epi mande deplwaman tout manm Fòs represyon gang yo (FRG) ak renouvèlman manda misyon an.

CARICOM di li rekonèt estabilite nan tout rejyon an depann de sekirite ak estabilite ki dwe genyen an Ayiti.

Òganizasyon an reyitere angajman li pou rapousuiv kolaborasyon l ak otorite ayisyèn yo, Nasyonzini, òganizasyon Eta ameriken yo (OEA) epi lòt patnè yo, yon fason pou Ayiti kapab rezoud kriz la nan kreye kondisyon nesesè pou gen sekirite pou eleksyon kapab rive fèt nan peyi a.

0 1

Selil kòdonasyon sit yo (CCS), se non yon nouvo platfòm ki lanse, Jedi 9 jiyè 2026 la. Selil sa regwoupe tout komite kan yo ki nan komin Dèlma, pou defann dwa moun k ap viv nan kan deplase yo.

Kòdonatè CCS a, Dumé Emmanuel, bat bravo pou gwo avanse gouvènman an fè nan kad demach pou ede moun k ap viv nan kan deplase yo retounen lakay yo pa twò lontan.

0 0

Direksyon Nasyonal Dlo pòtab ak asenisman (DINEPA) reyalize, jedi 9 jiyè a, yon vizit teren pou stajyè yo nan plizyè sit DINEPA zòn metwopolitèn nan.

Objektif inisyativ sa a se pou pèmèt etidyan sa yo ranfòse kapasite teknik yo.

Yon demach ki antre nan kad mizanèv pwogram ranfòsman konpetans « Eau Potable et Assainissement », enstitisyon an te lanse nan mwa me pase a.

2 0

Responsab yo nan pwogram kantin eskolè "PNCS" reyalize, jedi 9 jiyè 2026 la, 13èm tab sektoryèl yo, sou alimantasyon eskolè nan peyi Dayiti.

Atelye travay sa te okazyon pou aktè yo debat sou alimantasyon eskolè an Ayiti epi prezante bilan entèvansyon yo pou ane pase a ak pèspektiv yo pou ane akademik 2026 / 2027 la.

1 0

Ko-direktè defansè plis la, Mèt Antonal MORTIMÉ, di yo konstate 5 lane aprè zak asasina sou prezidan Jovenel MOÏSE, ankèt la pa vanse nan peyi Dayiti.

Li mande pou lajistis akselere dosye sa a, yon fason pou limyè fèt sou krim nan.

1 0

Gwoup entèvansyon Polis nasyonal Dayiti (IGPNH) anpil moun konnen sou non Swat Team selebre, mèkredi 8 jiyè 2026 la, 30 lane depi l egziste, kote gen yon mès aksyon gras ki te chante nan okazyon an, nan lokal Swat la a nan Klèsin 8, nan Komin Taba.

Plizyè pèsonalite te asiste seremoni an, tankou reprezantan direktè jeneral a.i PNH la, enspektè jeneral Joseph Plonquet.

« Lwayote, onè ak konfyans » : se deviz inite sa a ki te kreye 8 jiyè 1996.

1 0

Òganizasyon sosyo politik KONEKTE AYITI, gras ak sipò Gouvènman an, fè yon vizit solidarite nan kan deplase Atletik, ki twouve li nan zòn Douya, komin Site Solèy.

Nan okazyon an, responsab estrikti sa, distribye kit ijenik bay moun k ap viv nan kan deplase sila a.

Kòdonatè jeneral KONEKTE AYITI a, Evens Jean, bat bravo pou gwo travay gouvènman an ap fè pou ede tout moun k ap travèse moman difisil dènye tan sa yo. Li pwofite mande otorite yo, nan pi wo nivo leta a, pou ede deplase yo nan Site Solèy retounen lakay yo.

3 1