Yegada Min Pres Jetten
Awe den careda di 5:30 di atardi , Prome Minister di Hulanda, Rob Jetten a yega Aruba for di Boneiro. Na su yegada, e la wordo ricibi pa Prome Minister di Aruba Mike Eman acompaña pa su esposa Doina hunto cu varios invitado. Esaki ta e prome bishita oficial na Aruba di e mandatario como Prome Minister di Hulanda. For di 8 pa 14 di mei, Prome Minister Jetten lo bishita Sint Maarten, Saba, Sint Eustatius, Boneiro, Aruba y Corsou y lo hiba combersacion cu tur e Prome Ministernan, gobernantenan, y miembronan di Parlamento di Aruba, Corsou, y Sint Maarten, como tambe gezagheber y Conseho Insular di Boneiro, Sint Eustatius y Saba.
E combersacionnan aki lo trata entre otro topiconan manera resiliencia, siguridad y sostenibilidad. Adicionalmente, e bishita ta inclui un programa diverso cu ta inclui charla cu habitante, empresario y organisacionnan social. E mandatario lo tin un agenda basta ocupa e dia di mayan na Aruba den cual e lo bishita diferente lugarnan manera Parke Nacional Arikok entre otro y lo reuni cu Conseho di Minister y miembronan di Parlamento di Aruba, como tambe lo haya un recorido den Aereopuerto Internacional Reina Beatrix. Nos colega Angie Dirks hunto nos camarografo Jeremy Vrolijk tabata na aeropuerto na e momento di e yegada di Prome Minister Rob Jetten
