Gran TIT || Jounal Kreyòl Premye Okazyon lendi 6 mai 2024

1.- Manm konsey prezidansyel tranzisyon an toujou poko mete yo dako anviwon 7 jou apre gwoup 4 konseye yo fin chwazi Edgard Leblanc Fils kom prezidan konsey la . Chak gwoup kontinye kenbe menm pozisyon yo ,sa ki pouse anpil moun deja ap poze kesyon sou ki avni konsey prezidansyel tranzisyon sa ki gen yon manda kap bout we pa we 7 fevriye 2026 . Konseye yo pa menm rive antann yo sou piblikasyon pwose vebal kap konfime chwa prezidan konsey la malgre majorite a montre yo pa gen pwoblem ak dezisyasyon Edgard leblanc Fils kom prezidan . Yon rankont ta dwe oganize ant konseye yo jodi lendi a , yon fason pou gade kouman rezoud kriz ki eklate nan mitan konseye yo Selman 12 jou apre prestasyon seman ak enstalasyon yo pou dirije tranzisyon politik la . 2.-Pandan konsey prezidansyel la ap fe tan pase popilasyon an kontinye ap mouri grangou, 5 milyon moun twouve yo nan ensekirite alimante , wout nasyonal nou yo kontinye rete anba kontwol bandi ak zam yo, ayopo entenasyonal Tousen Louvetu ak por nou yo toujou rete femen, pot anpil lekol ak gwo magazen rete femen . San bliye yon seri gran chantye kap tann konsey prezidansyel la tankou fenomen ensekirite a ,refom konstitisyonel ak oganizasyon bon jan eleksyon nan peyi a . 3.-31 se kantite lopital,sant sante ak dispanse ki piye oubyen femen akoz ogmantasyon zak vyolans bandi ak zam yo ,nan dives komin depatman lwes la tankou kwadeboue,potoprens,petyonvil ,kafou,delma ,gantye,tomazo ak komin kabare . Pami enstitisyon sanite sa yo nou jwenn lopital St-francois de sales ,lopital franse dayiti,lopital jeneral ,lopital sanatorium,lopital mars and klein,;lopital jude Anne (Dash) ak sant sante Gheskio potoprens. Pou bay swen ak sevis sante ak yon pati nan poliasyon an ,Ministe sante piblik atrave direksyon depatmantal lwes la deja oganize klinik mobil nan yon kenzen kan sinistre yo epi refere fanm ansent yo nan lopital Eliazard Germain petyonvil ak lopital lapaix delma 33,dapre Direkte depatmantall sante lwes la Dr Beneche Martial. 4.-Pati politik UNIR-HAITI we ak move je divizyon ki genyen nan mitan konsey prezidansyel tranzisyon an ki tonbe nan lese frape olye yo travay pou soulaje soufrans popilasyon an . Pou prensipal dirijan pati sa,Clarens Renois li enpotan pou gen inite ak tet ansanm nan mitan manm konsey la ki chaje ak yon ansanm gwo defi kap tann yo pou leve . UNIR -HAITI lanse apel bay chak manm ak sekte ki fome konsey la pou fe jefo pwoteje konsansis 3 avril 2024 la ki pote lespwa rekonsilyasyon nan mitan sosyete a ak klas politik la . Nap gen poun pale ak Clarens Renois nan jounal la maten an . 5.-Peyi etazini deside dekese yon total 75 milyon dola ane sa pou deplwaman fos miltinasyonal la,dapre lapres amerikenn . Lajan sa pral sevi pou ede konstwi batiman pou polisye ak solda yo, achte ekipman milite tankou plis pase yon Santen cha blende sofistike ,plizye dwon siveyans ak fizi pou snipers ap gen pou achte nan lajan sa tou. Antretan dapre enfomasyon yo premye twoup peyi kenya yo ta dwe rive nan peyi a 26 me kap vini la. 6.-2 polisye plase nan izolman nan kad anket pake jiridiksyon an tanmen sou evazyon prizon sivil podepe a 3 me pase a, dapre sibstiti komise gouvenman Jeir Pierre . Evazyon sila rive nan moman 2 polisye tal louvre pot yon sellil pou pote sekou ak yon prizonye ki tap soufri ak yon malez . Dapre denye chif yo sou 37 prizonye ki nan selil sa gen 7 ki sove ,5 lot mouri pami yo Simon Adlando alyas 3 milyon ak Joseph Alexene alyas kabicha 2 prezime bandi lapolis te arete pou enplikasyon yo nan zak kriminel . 7.-Louis Jeune JEAN alyas Blan ,31 lane se non yon manb gang Boutba kap opere nan katye Mariani ki jwenn arestasyon li Samedi 5 Me pase a, nan gran katye Mabyal komin Jakmēl. Ajan lōd yo jwenn nan men endividi a 113 mil 500 goud, daprē direksyon depatmantal polis Sidēs la. 8.-Plizye anplwaye sena repiblik la oganize yon sitin vandredi pase a , devan prizon delma 33 ,pou pwoteste kont arestasyon ansyen sekrete jeneral sena,Marie Nelly Verpile Boyer . Madam Boyer pa gen anyen pou we ak zak koripsyon konsenan kat debi ak detounman machin leta nan enstitisyon an .Se jij enstriksyon Merlan Belabre kite bay lod arete madam Boyer apre odisyon li jedi 2 me pase a ,nan kad dosye koripsyon nan sena repiblik la. 9.-Plis pase 4mil 910 kay inonde ,25 andomaje ,15 lot detwi ak 17 moun mouri ,se bilan gwo lapli ki tonbe nan rejyon nor peyi a soti 28 avril pou rive 2 me pase a ,dapre yon rapo-bilan direksyon jeneral pwoteksyon sivil . Rapo sa konnen depatman nor ak nodwes peyi a kote anviwon 3 moun te mouri nan yon menm fanmi .