MinSal Obesidad
Awe, 1 di December 2025, Minister di Salubridad,
Asunto Social, Cuido di Adulto Mayor y Maneho di Adiccion, sra. drs. Melvin Wyatt-Ras, a presenta oficialmente e ‘Plan Nacional pa Combati Obesidad 2025-2030’, un strategia multisectoral dirigi na reduci e tasa di sobrepeso y obesidad na Aruba y pa fortalece salubridad publico. Actualmente, Aruba ta enfrenta un situacion preocupante. Durante e ultimo añanan, e cifranan di sobrepeso y obesidad a subi. Segun cifra nan ta indica cu 79% di e poblacion tin sobrepeso (esaki ta igual na 4 di cada 5 persona). Di nan 46% ta obeso, aproximadamente 49.382 persona. Y den nos mucha nan e cifra ta rond 42.7%.
