Canada / Déclaration sur l’intégrité du processus électoral
Peyi Kanada afime yon lòt fwa ankò sipò yo bay pèp ayisyen an ak pwosesis elektoral la, nan lide pou retabli gouvènans demokratik, ranfòse enstitisyon piblik yo, ankouraje lapè, sekirite ak pwosperite k ap dire.
Pwochen eleksyon jeneral yo pral yon etap enpòtan nan tranzisyon demokratik la an Ayiti. Pandan preparasyon pou pwosesis elektoral la ap kontinye, li enpòtan pou kenbe pi wo estanda nan domèn entegrite ak transparans, epi pou prezève konfyans piblik la, daprè yon nòt Afè mondyal Kanada pibliye vandredi 30 oktòb 2026 la.
Yon lòt bò peyi Kanada di li enkyete dèske gen kèk moun ki anba sanksyon entènasyonal pou kontribisyon yo nan vyolans, koripsyon, vyolasyon dwa moun oswa destabilizasyon Ayiti, k ap chèche prezante kandidati yo nan eleksyon k ap vini yo.
Kalite kandidati sa yo riske detwi konfyans piblik la nan pwosesis elektoral la ansanm ak objektif pou retabli yon gouvènans lejitim, responsab ak demokratik an Ayiti.
Nan sans sa, Kanada afime lejitimite sanksyon entènasyonal yo ki vize moun ki enplike nan aktivite tankou konplisite ak rezo kriminèl ak gang ame, koripsyon, trafik ilegal, blanchi lajan, vyolasyon dwa moun oswa lòt zak ki anpeche lapè, sekirite ak estabilite enstitisyonèl Ayiti. Yo souliye tou enpòtans pou kontinye aplike sanksyon sa yo.
Kanada mande otorite ayisyèn yo ak Konsèy Elektoral Pwovizwa (KEP) pou yo asire pwosesis elektoral la dewoule nan respè strik lwa ak règleman ki la pou sa epi ankouraje tout aktè politik yo pou yo montre angajman yo anvè prensip demokratik yo, egzèsis responsab lidèchip yo nan enterè nasyonal la.
