Sector Musical invita pa Consulta Nacional di Patrimonio
Den un conferencia di prensa, Presidente di Comision Nacional Patrimonio Cultural Intangibel Aruba, Ray-ann Hernandez, ta invita tur miembro di e sector musical pa participa den e prome Consulta Nacional cu lo enfoca riba e tema: “Ban Combersa di Musica na Aruba”. E iniciativa aki ta forma parti di un proceso pa desaroya Aruba su inventario oficial di Patrimonio Cultural Intangibel, cu e meta pa documenta y reconoce e diferente expresionnan musical cu ta forma parti di nos identidad cultural. Tambe a elabora mas riba e importancia di e proyecto, indicando cu musica ta un elemento clave den cultura Arubiano y cu e consulta lo crea un espacio amplio pa dialogo, intercambio di idea y reflexion riba preservacion y desaroyo di musica na Aruba.
